கானாத் தாலாட்டு

கானாப் பாட்டு என்பது சென்னை போன்ற நகரங்களில், நாட்டுவழக்காகப் பாடும்  ஒருவகைச் சந்தம் கொண்ட பா இனம்.  அவ்வகைப் பாடலொன்றைக் கீழே காணலாம். 

<>0<>0<>0<>0<>0<>0<>0<>

கானாத் தாலாட்டு

<>0<>0<>0<>0<>0<>0<>0<>

தாலேலோ! செல்லையா

தூக்கம்இன்னும் வல்லியா

தாயிவந்து பாடு றேம்பார் தாலாட்டு - நீயி

தயவுசெஞ்சு நிறுத்திப் போடு வாலாட்டு!

நாயிவரும் குருவிவரும்

நாலுயானை நடந்துவரும்

கதைகதையாச் சொல்லப் போறேன் கேப்பியா? - இல்லை

கண்ணைமூட மறந்து என்னெப் பாப்பியா?

முன்னெமுன்னே நடந்ததயும்

முடிஞ்சுபோயிக் கடந்ததயும்

சொல்லப் போறேன் சும்மா இருக்கப் போறியா? - இல்லை

தூக்கச் சொல்லி அடம் பி டிக்கப் போறியா?

பத்துமாசம் சொமந்தபின்னே

பட்டுப்போல பொறந்தஉன்னெ

அப்பன் காரன் தூங்கப் பண்ணத் தேவலே- எனக்கு

அந்த நாளு உடம்பு வலி போவலே!

தூளியிலே முத்தெக் கட்டி

தொட்டிலிலே வைரங் கட்டி

ஊருக்கெல்லாம் ராசா நீன்னு சொல்லுவேன் - அதை

ஒருபயலும் எதுத்துச் சொன்னாக் கொல்லுவேன்!

வாசமொழுகிக் கோலம்போட்டு

வக்கணையா வெளக்கு வைக்க

நாளை எனக்கு வந்திடுவா மருமவ - அவ

நடைஅளகைப் பாத்து நீயும் திரியுவே!

வயசுகாலம் வருகயிலே

வைத்தியத்துக்கு அலகயிலே

அம்மா பாடின பாட்டைக் கொஞ்சம் நெனச்சுக்கோ! - அவ

அம்பைப் பாத்துக் கையை நல்லாப் புடிச்சுக்கோ!

பாடிக்கிட்டே நானும் போக

பத்துமணியும் ஆயிப் போக

குஞ்சுக்கண்ணெ நீயும் கொஞ்சம் மூடணும் - உன்

குறும்பையெல்லாம் கட்டி வச்சுப் போடணும்!

ஒண்ணேஒண்ணு கண்ணேகண்ணு

ஒனக்கும் எனக்கும் ஒரே மண்ணு!

ஏனுஎன்னெ அப்படிநீ பாக்குறே? - என்னெ

எடுத்து எங்கோ மானத்திலே தூக்குறே!

தாலேலோ செல்லையா

தூக்கம் இன்னும் வல்லையா?

தாயி வந்து பாடுறேம்பார் தாலாட்டு - நீயி

தயவுசெஞ்சு நிறுத்திப்போடு வாலாட்டு!

..... அனந்த்  (’அமுதசுரபி’’ தீபாவளி மலர், 2004)

ஒலிப்பதிவு: http://raretfm.mayyam.com/ananth/thalelo.mp3