கண்ணன் பிறந்தான்

                 

                   <> கண்ணன் பிறந்தான் <>

நறுமணம் நாறும் பூக்கள் நள்ளிர வலர சாந்தம்

உறுமன முடைய  மேலோர் உவகையில் மகிழப் பூமி

சிறுமழை நனைந்து மேனி சிலிர்த்திடச் சிறையி னுள்ளே

குறுநகை தவழமாயன் குழந்தையாய் அவத ரித்தான்

                                    ****

                      <> குழலோசை <>

மலர்பூத்தது வனம்பூத்தது மதிபூத்தது மகிழ்ந்து

நிலம்பூத்தது நதிபூத்தது நிழல்பூத்தது நாட்டில்

தலம்பூத்தது குடிபூத்தது சனம்பூத்தது வானோர்

குலம்பூத்தது கருமாமணி குழலோசையின் ஒலியில்

                                    ****

                        <> கழல் நிழல் <>

மூங்கிலில் இசையைக் கூட்டும் முகில்வணன் குரலைக் கேட்க

ஏங்கிடும் அன்பர் நெஞ்சில் இனியதோர் கானம் ஆவான்

தாங்கிடும் குன்றால் தன்னைச் சார்ந்தவர் துயரம் தீர்த்தோன்

பூங்கழல் நிழலில் நின்றால் பொங்கிடும் இன்பம் வாழ்வில்!

                                    ****

                         <> மாயனின் சீர் <>

பெருவரை ஏந்தும் கையன் பெற்றமுடை ஆயர்

.. பேசுவதை வேட்கும் பையன்

கருமுகில் வண்ண மெய்யன் கஞ்சனுயிர் நீக்கிக்

.. காசினியைக் காத்த துய்யன்

அருமறை ஏத்தும் ஐயன் அன்புடையர் நெஞ்சை

.. ஆசனமாய்க் கொண்ட மெய்யன்

வருதுயர் தீயில் தூசாய் மங்கவைக்கும் இந்த

.. மாயனிவன் சீராம் ஐயே!

                            ****              

.. அனந்த்

24-8-2016

தமிழர் கண்ட புதுமை

<> தமிழர் கண்ட புதுமை <>

நாமகள் ஈங்கிவர் நாவினில் ’ராக்-அன்-ரோல்’

.. நர்த்தனம் செய்வதாலே

...... நாடொறும் அகத்திலே, அலுவலில், பள்ளியில்

.......... நடக்கையில், உறங்கிடுங்கால்

மாமியின், டாடியின், அங்கிளின், ஆன்ட்டியின்,

.. மழலையின் வாயில்நித்தம்

...... மருவிடும் ஆங்கில மொழியதன் மேன்மையில்

.......... மனமெலாம் லயித்துநிற்க

ஸ்வாமிஜி நவின்றிடும் ஆங்கில உரையினை

.. ’ஸ்கைப்’வழி பார்த்துநிற்பார்

...... சலிப்பது தருவதைத் தவிர்த்திடக் ’கிடா’ரைத்

.......... தடவிமைக் ஜாக்சனைப்போல்

பூமியில் கைகளை ஊன்றியே சுழலுவார்

.. புதியதோர் பரதமென்று

..... புதுமையை இங்ஙனம் தமிழர்கள் வாழ்வினில்

....... புகுத்தியே பெருமைகொண்டார்!

அனந்த்

(19-7-2010)   

அந்தி மாலைப் போது

<>0O0<> அந்தி மாலைப் போது  <>0O0<>



.... அந்திமாலைப் போதிலே
.... அருகில்வந்து காதிலே

வந்துசொன்னாள் வாலிபத்தின் சேதியை -அதில்
மறந்துவிட்டேன் நான்பிறந்த தேதியை!
 *
... ஆரவளோ வான்மகள்
... அறிந்திலேன்அப் பூநிகர்

நாரிமணம் தொட்டதென்றன் நாசியை - உடன்
நானிழந்தேன் என்னுடைய வாசியை
 *
... ஆங்கிருந்த புல்வெளி
... ஆனதொரு விண்வெளி

ஓங்கிஅங்கே உயர்ந்ததென்றன் ஆவலும் - கூவி
ஓலமிட்ட தென்றன்உள்ளச் சேவலும்
 *
... சலசலக்கும் ஓடையைச்
... சார்ந்தவள்தன் ஆடையை
நனைத்தழகு விழிமலரால் சீண்டினாள் - என்
நினைவின்அடித் தளத்தினையே தோண்டினாள்
 *
... புவிமுழுதும் பூக்களாய்
... புலவனது பாக்களாய்க்

கவிழ்ந்தெனது துயரைஎல்லாம் மூடின- காதல்
கதைகள்பல மனத்திரையில் ஆடின

 *
அந்தஅம்பி காபதி
அழகிஅம ராவதி

தந்தபோதை தன்னில் கண்ட தோற்றமும் - அதைத்
தொடர்ந்தவன்தன் கதையடைந்த மாற்றமும்
 *
... முந்திவந்து மூளையை
... மோதஅந்த வேளையின்

தந்திரத்தை நெஞ்(சு)உ ணர்ந்து போனதால் - மோகத்
தாகம்உலர்ந் தேசருகாய் ஆனதே!
 *
... இன்றிழைக்கும் பிழைகளே
... இன்னல்தரும் மழைகளாய்ப்

பின்னர்ஆகி வாட்டுமென்ற போதனை - நினைவில்
மின்ன,கனவு கலைந்த(து);என்ன வேதனை!

                 ::: <>0O0<> ::: 

ஆணும் பெண்ணும்

<> ஆணும் பெண்ணும் <>

கண்ணென்றேன் காதலெதன் கண்ணென்றாள்; நங்காய்!நீ

பண்ணென்றேன் வேறுதொழில் பண்ணென்றாள்; என்னிலையை

எண்ணென்றேன் ஆற்றுமணல் எண்ணென்றாள்; என்அன்பை

உண்ணென்றேன் உண்ணாக்கில் புண்ணென்றாள் புண்பட்டேன்- நான்

ஆடென்றேன் ஆங்கதுபுல் மேயுதென்றாள், நன்றுநீ

பாடென்றேன் ஐய!பெரும் பாடென்றாள், என்னைநீ

நாடென்றேன் தான்வேறு நாடென்றாள் விரைவிலெனைக்

கூடென்றேன் நீகிளிஞ்சல் கூடென்றாள், குமைந்தேனே நான் 

அணையென்றேன் அயர்வதற்கோர் அணைதந்தாள் அதன்மேலும்

அணையென்றேன் ஆங்கிருந்த அகலணைத்தாள் அடிபெண்ணே!

அணையென்றேன் அன்பிற்கே(து) அணையென்றாள் ஐயோ!நீ

அணையென்றேன் அவளணைத்தாள் அம்மம்மா! அதன்சுகமே!

(உண்ணாக்கில்  - உள் நாக்கில்)

..அனந்த் 

http://chandhamanantham.blogspot.ca/

சந்தவசந்தம் இணையத் தளத்தில் இட்டது, 1-7-2016

ரமண குரு

  <>  ரமண குரு <>

(வெண்பா அந்தாதி )

கருத்தனை நம்முள்ளே காண்பதே வாழ்வின்

அருத்தம்எனத் தாம்அறியா மாந்தர் - வருத்தும்

கருச்சுழியில் சிக்காமல் காப்பதற்(கு) அன்று

திருச்சுழியில்* தோன்றியதோர் தீ  1

தீப்பிழம்பாய்த் தோன்றிய தேவின் திருத்தலப்பேர்

நாப்பழக்க மாய்க்கொண்ட நல்லோனைப்  – பாப்புனைந்து

போற்றும் செயலால் புனிதம் பெறநினைத்துச்

சாற்றுவேன் அன்னான் தகை  2

அன்ன(ம்)நிகர்ப் பெண்ணொருத்தி ஆரூரன் நாமத்தை

முன்னம் பிறர்மொழியக் கேட்டதுபோல்^** – தன்னுள்ளே

தாரக மாயொலித்த சத்தம் ஒருதலத்தின்

பேரென்று பிள்ளைஅறிந் தான்  3

அறிவில் நிலைத்த அருணையின் வண்ணம்

குறித்துமனம் கொண்ட களிப்பில் – வெறிகொண்டு

பித்தன் எனப்பிறர் பேசும் நிலையடைந்தான்

சித்தனாய்ப் பின்திகழ்ந் தோன்  4

தோன்றும் பொருள்யாவும் சோணா சலமெனஉள்

ஊன்றி அதிலுறைவோன் உள்ளபடி – ஈன்றதன்

தந்தையென ஏற்றுத் தனைப்பெற்றோர் சுற்றம்பால்

பந்தமறுத் தான்பா லகன்  5

அகத்தைக் கவர்ந்ததன் அத்தனைத் தேடிச்

சகமெலாம் சுற்றியபின் சேர்ந்தான் – இகத்திலெங்கும்

காணவொண்ணா அண்ணா மலையானை; கண்டபின்

நாணமிலா நங்கைஒத் தான்.^##   6

தான்யார் எனமறந்தான் தன்நாமங் கெட்டான்அக்

கோன்பால் தலைப்பட்டான் குன்றதனில் – மோனத்தில்

ஆழ்ந்தான் அருண அசலம்போல் ஆனந்தம்

சூழ்ந்ததவன் உள்ளில் தொடர்ந்து  7

தொடங்கிய நாள்முதலாய் தோல்போர்த்த தேகம்

விடவந்த வேளைவரை தன்னை – அடைந்தோர்க்குக்

காட்டினான் கல்லாலின் நீழல்கீழ் நால்வர்ஐயம்

ஓட்டியவன் ஒத்தோர் வழி   8   

வழிந்தோடும் எண்ணப் பெருக்கே மனம்அஃ(து)

அழிந்திட”நான் ஆர்”என்னும் கேள்வி – ஒழியாது

நம்முள் எழுப்பின் நசியும்அகங் காரமெனும்

வெம்மைமிகு நோய்நமை விட்டு  9

நமைநாம் உணரின்நம் உண்மைச் சொருபம்

அமைதியே என்றறிய வைத்த – உமைமகிழும்

ஈசன் உருவாம் இரமணப்பே ராசானின்

ஆசிநமக் கென்றும் அரண்  10

அரவணைக்கும் அன்னை அருளொளி வீசும்

இரவி எனரமணர் அந்நாள் - கருணை

அலையாய் நமக்களித்த ஆன்மவி சாரம்

கலையா(து)உள் நிற்கும் கருத்து.  11.

.. அனந்த்

பின்குறிப்பு:

திருச்சுழி - பகவான் ரமண மஹர்ஷி பிறந்த தலம்

**திருவாரூரில் குடிகொண்டுள்ள தியாகேசன்பால் தீராக் காதல் வயப்பட்ட நங்கை ஒருத்திக்கு நிகழ்ந்த மாற்றங்களைத் திருநாவுக்கரசப் பெருமானார்  தமது பாடலொன்றில் அழகுற வருணித்துள்ளார்:

முன்னம் அவனுடைய நாமங் கேட்டாள்
    மூர்த்தி யவனிருக்கும் வண்ணங் கேட்டாள்

பின்னை யவனுடைய ஆரூர் கேட்டாள்
    பெயர்த்தும் அவனுக்கே பிச்சி யானாள்

அன்னையையும் அத்தனையும் அன்றே நீத்தாள்
    அகன்றாள் அகலிடத்தார் ஆசா ரத்தைத்

தன்னை மறந்தாள்தன் நாமங் கெட்டாள்
    தலைப்பட்டாள் நங்கை தலைவன் தாளே.   – (திருமுறை 6.25.7)

பகவான் ஸ்ரீரமண மகரிஷியின் வாழ்வில் நிகழ்ந்த மாற்றங்கள் ஒவ்வொன்றும் அந்த நங்கைக்கு ஏற்பட்டவைகளோடு ஒத்திருப்பதை, திருமதி. கனகம்மாள் ”ஸ்ரீ ரமண நூற்றிரட்டு உரை” என்னும் நூலில் சுட்டியுள்ளார். மேல்காணும் கவிதை அக்கருத்தை ஒட்டி அந்தாதி வெண்பாக்களால் அமைக்கப்பட்டது.

^## இரமணர் இயற்றிய அருணாசல அக்ஷர மணமாலை என்னும் துதியில் அருணாசலத்திறைவன்பால் மையல் வயப்பட்ட தலைவியாகத் தம்மைப் பாவித்து எழுதிய பாடல் வரிகள் சிலவற்றைக் குறிப்பது. 

வெள்ளம் அளித்த விடை

சந்தவசந்தம் கவியரங்கம் - 42

தலைவர்: கவிமாமணி இலந்தை சு. இராமசாமி
தலைப்பு: வெள்ளம் அளித்த விடை
கவிதை: : அனந்த் (அனந்தநாராயணன்)
   

இறைவணக்கம்:

வெள்ளமுண்டு விடையுமுண்டு மெய்யடியார் கள்ளமில்லா
உள்ளமுடன் ஆற்றுபணி விடையுமுண்டு உன்றனுக்கே
எள்ளனைத்தும் தகுதியிலா எளியனெனக் குன்னருளை
வெள்ளமெனப் பொழிந்துகவி வித்தகமுண் டாக்குவையே.

தலைமை வணக்கம்:

கவிமா மணியென்பார் கவிஞருக்குள் வேழமென்பார்

புவியே இவர்கரத்துள் புகுமென்பார் தமிழார்வம்

அவியா(து) எரிகின்ற அகலென்பார் அவர்க்குக்கை

குவியார் இலையென்பார் கவிப்பேன்என் தலைஅவர்க்கே.

அரங்கக் கவிதை:

<> வெள்ளம் அளித்த விடை <>

ஊனைத் தின்னும் வனவிலங்கோ

.. உயிரைத் தின்னும் ஒருபேயோ

ஈனம் மிகுந்த உயிரினமோ

..எமனார் விடுத்த பெருங்கயிறோ

வானைப் பிளந்து வந்தெங்கள்

.. வாழ்வைப் பறித்த பேய்மழையே!

ஏனிக் கொடுமை? எளியோங்கள்

.. என்ன பிழைதான் ஆற்றிவிட்டோம்?

****

சென்னைவாழ் மக்களின் வேதனையை - நன்கு

.. சித்தரிக் கும்இந்த கேள்விக்குநீ

என்ன விடையை அளித்திடுவாய்- என்று  

.. இன்றந்த மாரியை நான்வினவ

அன்னை யவளும்தன் வாய்திறந்து - மிக்க

.. அன்பு ததும்ப நவிலலுற்றாள் 

முன்னமவ் வள்ளுவன் வான்மழையின் - தன்மை

.. மொழிந்த அறிவுரை கேட்டிலையோ?**

இன்னும் விளக்கிட ஓர்கதையை

.. இங்கே உரைக்கின்றேன் ஆங்கதன்பின்

என்னைப் பழித்திடும் மாந்தர்கள்தம்

.. எண்ணம் தெளிந்துண்மை தோன்றிடுமே.

                 *** 

துள்ளி விளையாடும் மீன்களுண்டு  - கரை

.. தள்ள முயலும் அலைகளுண்டு

கொள்ளை அழகுடன் பூர்ணைநதி – ஓடும்

… கோலத்தைக் காண்பவர் கூட்டமுண்டு

காலடி என்னும்சிற் றூரிடையே – பல

.. காலமாய் ஓடும்அவ் வாற்றினிலே

சீலம் மிகுந்தவோர் மாதரசி – நித்தம்

.. சென்று குளித்து மகிழ்வதுண்டு

ஆரியை என்னும்நற் பேருடைய – அந்த

.. அன்னை வயிற்றினைத் தேர்ந்தெடுத்துத்

தூரிய ஞானச் சுடரொளியாய் – வந்து

.. தோன்றினன் சங்கர தேசிகனே.

தாயின் மனத்தைக் குளிரவைக்கும் – எழில்

.. தண்மதி யாகத் திகழ்ந்துவந்த

தூயவன் சேவையில் தோய்ந்தவளும் – ஒரு

.. துன்பமு மில்லா திருந்துவரத்

தேகம் தளரும் முதுமையிலே – முன்போல்

.. தினமும் நதிக்கு நடந்துசெல்லும்

வேகம் குறைந்திடக் கண்டுமனம் – கொள்ளும்

.. வேதனை தன்னை மகன்உணர்ந்தான்

நன்மனம் கொண்டவோர் நங்கையிடம் – பிக்ஷை

.. நாடிச்சென் றாங்கவள் ஏழ்மைகண்டு

பொன்மழை பெய்திடச் செய்தவனாம்# – அந்தப்

.. புண்ணியன் மேலுமோர் விந்தைசெய்தான்:

பூர்ணை நதிக்கரை சார்ந்தவளின் – புகழ்

.. போற்றிப் பரவித்தன் தாய்விரதம்

பூர்ண மடைந்திட வேண்டுமெனில் – ஆறு

.. போகும் தடத்தினை மாற்றிமனை

அண்மையில் செல்லென வேண்டிநின்றான் – அந்த

… ஆறும் அதற்குடன் சம்மதித்தாள்

கண்முனம் ஓடும் பெருநதியை – ஆர்யை

.. கண்டுசேய் தெய்வ மெனஉணர்ந்தாள்  

அன்னைக்கு ஆற்றும் கடமையிலே – ஓர்

.. அணுவும் பிறழாத சங்கரனின் 

தன்னல மில்லாத செய்கையினால்  - வெள்ளம்

.. தடம்மாறிச் சென்றதில் சேதமில்லை

முன்னம் பகீரதன் கங்கையளைத் - தன் 

.. முன்னோர் கதிபெறச் செய்வதற்கு

மண்ணில் வரச்செய்த சாதனைக்கும்- அவன்

.. வாக்கு மனம்செயல் யாவினிலும் 

தெள்ளத் துலங்கிய தூய்மைகண்டு - அந்தத்

.. தெய்வம் துணைநிற்ற(து) எண்ணிடுவாய் 

கள்ளத் தனத்துடன் நீர்த்தடத்தைப்- பல

.. கட்டுமா னங்களால் மாற்றிடுவோர்

வெள்ளத்தின் சீற்றத்தைத் தூண்டிமக்கள் - பெரும்

.. வேதனைக் குள்ளாக வைத்திடுவார்

உள்ளத்தில் நல்லோர் துணையிலினி - மீண்டும்

.. உன்னதம் எய்த வழிவகுப்பீர்!

****

இன்ன வகையிலே மாரியன்னை – என்றும்

.. இயற்கை செயல்படும் போக்குரைக்க

என்னுள் தெளிவு பிறந்ததுவே – இனி

.. என்றும் அவளருள் வேண்டிநிற்பேன்.

…அனந்த் 

 

குறியீடு விளக்கம்:

1)

** கெடுப்பதூஉம் கெட்டார்க்குச் சார்வாய்மற் றாங்கே

    எடுப்பதூஉம் எல்லாம் மழை - குறள் 2.15

2)

^#  பிக்ஷை கேட்டுத் தன் மனைக்கு வந்த சிறுவன் சங்கரனுக்கு, ஏழ்மையின் விளைவால், ஒரு நெல்லிக்கனியை மட்டும் அளித்த ஓர் இல்லாளின் அகத்தில் பொன்மழை பொழியச் செய்யவைத்த நிகழ்ச்சியைச் சுட்டுவது.