இல்லா வாழ்க்கை

முன்குறிப்பு: தானோ பிறரோ தேர்ந்தெடுத்த துணையோடு இல்லற வாழ்க்கை நடத்துவோரின் பெருமையை வள்ளுவர் பெருமான் அறத்துப் பாலில், இல்லறவியல் என்னும் தலைப்பில், இல்வாழ்க்கை என்னும் அதிகாரத்தில் (--அதிகாரம் யாருக்கு என்று அன்னார் குறித்திலர்-), அழகுபடப் பத்துக் குறட்பாக்களில் கூறியுள்ளார். அந்தப் பாக்களை ஒட்டி, எமக்குத் தெரிந்த இல்வாழ்க்கைச் சிறப்பை யாம் எடுத்துரைக்க விழைந்தனம். அதன் விளைவாக எழுந்த ்குறட்பாக்களை உங்களோடு பகிர்ந்து மகிழவும் அவாக் கொண்டனம். கீழே காணும் குறட்பாக்கள் வள்ளுவனார் தந்த அதே வரிசையில் (-பத்தாவது பாட்டைத் தவிர-), அவற்றின் சொல்லழகும் சுவையும் குன்றாவண்ணம் அமைக்கப்பட்டவை, (என யாம் நம்புகின்றனம்). ஐயமுறுவோர் திருக்குறளைக் கையிலேந்தி ஒப்பிடுவாராக.

        <>   இல்லா வாழ்க்கை   <> 

இல்வாழ்வான் என்பான் மணம்புரியா நண்பர்கள்

எல்லோர்க்கும் சோறளித்தல் ஏற்பு (1)

துறந்தாரும் தூரத்து உறவான பேரும்

கறந்திடுவார் இல்வாழ்வான் காசு (2)

தன்புலனில் தாரத் துடன்பகைத்த நண்பனுக்கு

உன்புலமே வீடென் றுணர் (3)

பழியஞ்சிப் பாத்தூண் உடைத்தாயின் வாழ்க்கை

அழியாமற் காத்தல் அரிது (4)

துன்பும் துயரும் உடைத்தாய இல்வாழ்க்கை

முன்பிருந்த ஜாலிக்(கு) எதிர் (5)

கடனெனக் காண்பதே இல்வாழ்க்கை அஃதை

உடன்தீர்க்க இல்லை வழி (6)

வறுத்தாட்டி இல்வாழ்க்கை வாட்டிடின் வாயில்

புறத்தேபோய்க் கூவென் றழு (7)

இயல்பினான் இல்வாழ்க்கை வாழ்வோன் களிப்பிற்கு

அயலாகி நிற்கும் அசடு (8)

ஆற்றொழுக்கு நாசிக் குழவிசேர் இல்வாழ்க்கை

நோற்பாரின் நோன்மை உடைத்து (9)

(நோன்மை = தவம், பெருமை, பொறுமை, வலி; இங்கு இறுதிப் பொருளில் பயிலும்!)

'கடி'ஜோக்குக் கேற்றதோர் கேலிப் பொருளாய்

அடிபடும்இல் வாழ்வான் தலை (10)

 .. அனந்த் 

(’’ஹப் மாகசீன்’, 2009: )

****** 

அவனும் நானும்

        <> அவனும் நானும் <>

சின்னதோர் தலையில் ஈசன்

என்னவோ எழுதி மண்ணில்

இன்னவா றிருப்பாய் என்று

முன்னமே விதித்து விட்டான்

வந்தநாள் முதலாய் இங்குச்

சொந்தமாய் நானே செய்ய

எந்தவோர் உரிமை யின்றி

நொந்துநான் இருக்க வைத்தான்

சிந்தையைத் திருப்ப வைக்கும்

பந்தமாய்ப் பலவே றான

சொந்தமும் அளித்தான் நானும்

அந்தகன் போல வாழ்ந்தேன்

            

இன்றுநான் செய்யும் எதுவும்

நன்றெனில் நன்றி சொல்வேன்

அன்றது தீமை ஆயின்

சென்றவன் பால்சொல் வீரே!

அனந்த் 2-11-2016

அறுசமயக் கடவுளர் துதி

’தா’ என்று முடியும் ஈற்றுச் சொல்லோடு) ஆறு சமயத் தெய்வங்கள் பேரிலும் இயற்றிய பாடல்கள்: 

<> அறுசமயக் கடவுளர் துதி <>

 விநாயகன்:

வந்திப்போர் ஆற்றும் வினையாவும் வெற்றிதர

முந்தி அருளும் முதல்வா!தாய் – தந்தையரை

வந்தாய் வலமாகக் கந்தனுக்கு முன்;ஏக

தந்தா! தமிழெனக்குத் தா. 

முருகன்:

வேதா அறியாத மெய்தான் விரித்துரைத்த

நாதா! சிதம்பரத்தோன் நற்புதல்வா! – காதலுடன்

கொந்தார் குழல்வள்ளி பாதம் வருடிமகிழ்

கந்தா! கவித்திறத்தைத் தா!

சிவன்:

தாதாதை தித்தித்தா என்றபல தாளத்தில்

மாதா மனம்மகிழ மன்றாடும்  - பாதா!நீ

காதாலென் பாக்கேட்டுக் கையால்நின் பேரருளைத்

தாதாஓ சொக்கநா தா!

சக்தி:

போதார் மலர்த்தார் புனைந்தோ உனைத்துதித்தோ

ஏதா கிலும்தாயே! ஈனன்யான் செய்திலன்இன்(று) – ஆதாரம்

நீதான் எனவந்தேன் நீசனென நீக்காது

மாதா!என் தாப்போக்கித் தா.

(தா= குறை, துன்பம், வருத்தம்…)

திருமால்:

ஐந்தாம் புலன்தந்தாய் ஆங்கவற்றுள் நான்சிக்கி

நைந்தால் நினக்கிழுக் கென்பதால் – மைந்தா!நீ

உய்க எனக்கூறி உன்நினைவென் உள்ளத்தில் 

வைகவரம் வைகுந்தா! தா!

சூரியன்:

பேதமிலா(து) எவ்வுயிர்க்கும் பேரொளியைத் தந்திடுவோய்!

ஓதுபெரும் மந்திரத்தின்* உட்பொருளே! - தீதகற்றிப்

போதம்அருள் புண்ணியனுன் தாள்பணியும் எற்(கு)எல்லாம்   

ஆதித்தா! சாதித்துத் தா.  

(*காயத்திரி மந்திரம்; எற்கு =எனக்கு)

அனந்த் 22-10-2016

”தா”ப்பாட்டு!

தா என்னும் சொல்லுக்கு அகராதியில் சுமார் 20 பொருள்கள் தரப்பட்டுள்ளன.  அவற்றில் பெரும்பாலானவற்றைப் பயன்படுத்தும் வெண்பா ஒன்று:

<> ”தா”ப்பாட்டு <>

தாவெனத் தாவுள்ள தாவோடு தாவுசெய்

தாவோர்மேல் தாவிமிகத் தாத்தந்தான் - தாவற்ற

தாவினைத் தாச்செய்த தாக்கண்டு தானவர்க்குத்

தாத்தரத் தாப்படைத் தோன்.

 (தானவர்க்கு = தான் அவர்களுக்கு; அசுரர்களுக்கு)

பொருள் விளக்கம்: தா என்று கேட்டவுடன் வலிமையுள்ள படையுடன் கேடுசெய்யும் கொடியோர்மேல் பாய்ந்து அவர்க்குப் பெரும் வலியும் வருத்தமும் தந்தான் - குறைவில்லாத (வளமுள்ள) நிலப்பரப்பை நாசம் செய்த குற்றம் கண்டு தான் அக்கொடியோர்க்கு அழிவு தருவதற்காகப் பிரமன் படைத்த அம் மனிதன் (வீரன்).

அல்லது:

(தேவர்கள் அருள்) தா என்று கேட்டவுடன் பிரமனைப் படைத்த திருமால், குறைவில்லாத உலகை நாசம் செய்த குற்றம் கண்டு அசுரர்களுக்கு அழிவு தருவதற்காக, வலிமையுள்ள படையுடன், கேடு செய்யும் அக்கொடியோர்மேல் பாய்ந்து அவர்க்குப் பெரும் வலியும் வருத்தமும் தந்தான்.

... அனந்த் :-)) 8-9-2009

இணையக் காவடிச் சிந்து <>

<> இணையக் காவடிச் சிந்து <>

எங்களிணை யத்திற்கிலை ஈடு-அது

எம்மனைய னோர்வதியும் வீடு - உளம்

இன்புறஇ னித்திடும்தேன் கூடு

வந்து கூடு(ம்)

அன்பர் நாடும் - அனை

வர்க்கும்பொது வென்றுளபண் பாடு  (1)

இந்தியரும் இங்கிலந்துள் ளோரும் - வேறு

எங்குமுள நாடுபுகுந் தோரும் - ஒரு

சாதியென உவகையுடன் சாரும்

இணையம் பாரும்!

இதற்கு நேரும் - எங்கும்

இல்லைஇ துணர்ந்துபகை தீரும்!  (2)

ஆயிரம்பல் லாயிரமாய்ச் சேர்ந்து - நாம்

அங்குமிங்கும் சேதிகளைத் தேர்ந்து - வெகு

ஆழமுடன் அலசிடுவோம் கூர்ந்து

இணையம் சார்ந்து

எதையும் ஓர்ந்து - செயும்

எவருமிங்கு விழுவதில்லை சோர்ந்து! (3)

கவிதையொடு கட்டுரைச மைப்போம் - பிறர்

காணமன ஓவியம்முன் வைப்போம் -தமிழ்க்

காதல்தரு கனிகளைச்சு வைப்போம்

இன்பம் துய்ப்போம்

துன்பம் பொய்ப்போம் - இந்த

இணையம்வழி எவரையுமி ணைப்போம் (4)

கவிதையறி வென்பதெனக் கில்லை - என்ற

கவலைமுன்பு கொண்டடைந்த தொல்லை - இனிக்

கடுகளவு மென்மனத்தில் இல்லை

இணைய வில்லை

எடுத்து ஒல்லை - இன்றி

இனித்தொடுப்பேன் இனியதமிழ்ச் சொல்லை (5)

...அனந்த் 

"குப்பைத் தினம்"

          "குப்பைத் தினம்"*

 

      

குப்பைக்கோர் நாளின்று பாரீர்! - சேர்ந்து 
கூடிஎல் லோருமாய்க் கொட்டுவோம் வாரீர்!   (குப்பைக்கோர்..)

வாரம் ஒரேஒரு நாளில் - வண்டி
வருமென் றறிந்துநாம் தூக்குவோம் தோளில்
சேரும்நம் குப்பைக் குவியல் - தரம்
தேர்ந்து பிரிப்போம் குறித்த வகையில்     (குப்பைக்கோர்..) 

நீல நிறத்தொரு பெட்டி - அதை
நிறைத்திடும் காகிதம் கண்ணாடிப் புட்டி
மேலும்உண் டோர்பச்சைக் கூடை - அதில்
வீசிடும் உண்டபண் டங்களின் வாடை!         (குப்பைக்கோர்..)

புல்லுடன் பூண்டெல்லாம் வெட்டி - பல
பைகளில் யாவையும் நன்றாகக் கொட்டி 
எல்லாமாய் வாசலில் சேர்ப்போம் - அதை
எடுத்திடும் வண்டி வரக்காத் திருப்போம்   (குப்பைக்கோர்..)

பூதக ணங்களைப் போன்று - பல
பேருந்து வண்டிகள் வீதியில் தோன்றும்
யாதொரு பாக்கியம் செய்தோம் - என்று
யாவரும் உள்ளத்தில் ஆனந்தம் எய்வோம்      (குப்பைக்கோர்..) 

ஆனை துதிக்கையால் தூக்கி - வாயில்
ஆகாரம் போடும் விதந்தன்னை நோக்கித்
தான்முன்னம் ஆச்சர்யம் கொண்டோம் - இந்தச்
சாதனங் கள்அதை விஞ்சுதல் கண்டோம்.        (குப்பைக்கோர்..)

கண்ணுக்கோர் நோயெனத் தோன்றும் - குப்பை 
கசங்கி நொறுங்கும் ஒலிஇசை போன்று
பண்பல சேர்த்து முழங்கும் - கேட்டுப்
பல்லோரின் வாய்களும் வாழ்த்தை வழங்கும்!  (குப்பைக்கோர்..)

ஊர்சேர்க்கும் குப்பையைக் கொட்ட - ஊரின்
ஓரத்தில் உண்டொரு மாபெரும் பொட்டல்
பார்சேர்க்கும் பாவமாம் குப்பை - கொட்டப்
பரமன்ஏன் தாரான்ஓர் பாழும்ப ரப்பை?       (குப்பைக்கோர்..)

(* ”குப்பைத் தினம்” - garbage collection day.)
.. அனந்த் (’திண்னை மின்னிதழில் 2002-ல் வெளியானது)