'அடை'மொழி

                                                   <>       'அடை'மொழி    <>

வேண்டும் வேண்டும் அடைவேண்டும்! -நன்கு

.. வெந்து முறுகிய அடைவேண்டும்!

மாண்டு போன நாக்கினுக்கு - அது

.. மறுபடி உயிரைத் தரவேண்டும்!

துவரை உளுந்து கடலையெனப் - பல

.. சுவையுள தானியம் அரிசியுடன்

அவரவர் தேவைக் கேற்றபடி - கலந்(து)

.. அரைத்துச் சுடுங்கால் அடைபிறக்கும்!

கார அடையுடன் தவலைஅடை - இன்னும்

.. காரடை யார்நோன் படையுண்டு

வாரம் மும்முறை அடையுண்டால்

.. வாரா தெந்த வலிநோயும்!

அடையும் அவியலும் ஆகாகா! - அதற்(கு)

.. ஆகா(து) இணைமிள காய்ப்பொடியும்

அடைந்தால் அடையே அதைத்தவிர - பிற

.. அற்பத் தனஉண் டிகள்அடையோம்!

வேண்டும் வேளை அடைவேண்டும் - பசி

.. வெறியை விரட்ட அடைவேண்டும்!

காண்டீன் ‘மெனு'வில் அடையின்றேல் - அக்

.. கடையை மூட வழிசெய்வோம்!

யாண்டும் தமிழர் இனம்காக்கும் - பணி

.. யாரம் அடையே எனஉணர்வோம்!

மீண்டும் அடையின் மேன்மையினை - நாம்

.. மீட்டிட மேலும் அடைஉண்போம்!

... 'அடையானந்தன்'
படம், நன்றியுடன்: padhuskitchen

சிலேடை- அரியும் அரனும்

http://chandhamanantham.blogspot.ca/2016/09/blog-post_25.html

                                                                 அரியும் அரனும்

                                         

           

                                தேரில்நல் ஆசான் திருவோடு காப்பார்தம்

                                

                                பேரிலே கண்ணர் பெரும்பசியர் வான்புரக்க

                                ஆழி யுறைவிடம் கொண்டிடுவார் அன்புடையோர்

                                வாழத்தாம் தூதாய் வழிநடப்பார் மாட்டார்

                                அரிவைஉடல் வைத்திடுவார் ஆடவல்லார் ஆமிங்(கு)  

                                அரியும் அரனென்று அறி.

அரி: அருச்சுனனுக்குத் தேரில் ஆசானாய்ப் போதித்தவர்; இலக்குமியோடு உலகைக் காப்பவர்; கண்ணன் என்பதைத் தமது பேர்களில் ஒன்றாய்க் கொண்டவர்; நல்ல பச்சைநிற (பசிய) மேனி உடையவர்; விண்ணுலகை ஆளப் பாற்கடலை உறைவிடமாகக் கொண்டவர்; பாண்டவர்களுக்காகத் தூது சென்றவர்; மாடு உடையவர் (இடையர்); சீதேவியை மார்பில் வைப்பவர்; (கோபியருடன்/ அல்லது, பாம்புத்தலைமேல்) ஆட வல்லவர்

அரன்: ஆராய்ந்தோமேயானால் (=தேரில்), சனகாதி முனிவர்களுக்குத் தட்சிணாமூர்த்தி குருவாய்ப் போதித்தவர்; பிச்சையெடுக்க ஓடேந்துபவர்; முக்கண்ணன் என்பதைத் தமது பேர்களில் ஒன்றாய்க் கொண்டவர்; (இரந்துண்டு வாழ்வதால்) பெரிய பசியோடு இருப்பவர்; தேவர்களைக் காப்பதற்காகப் பாற்கடலிலிருந்து எழுந்த நஞ்சை உட்கொண்டவர்; தம் அன்பனான சுந்தரமூர்த்தி நாயனாருக்காகப் பரவையிடம் தூது சென்றவர்; நந்தியை வாகனமாகக் கொண்டவர்; உமையை இடப்பாகத்தில் வைப்பவர்; அம்பலத்தில் நடம்ஆட வல்லவர்.

..அனந்த்

சிலேடை

<> ரங்கநாதன் தெரு - ஆதிசேஷன் சிலேடை <>

     நீண்டு கிடக்கும் நிதமும் இலக்குமியைப்

     பூண்டோன்பேர் தாங்கிப் பணம்பெருக்கும் – வேண்டும்

     பொருள்தரும் நீள்பயணம் போவோர் வழியாய்

      இருக்கும்  தெருஅனந்த னே.

(பணம் = காசு; பாம்பின் படம்.)

ரங்கநாதன் தெரு: நீளமானது; திருமாலின் பெயர் கொண்டது; விற்பனையாளர்க்குத் தினமும் பணத்தைக் கூட்டும்; எந்தப் பொருளும் அங்குக் கிட்டும்; புகைவண்டி நிலையத்திற்கான வழியாக அமையும்.

ஆதிசேடன்: நீண்ட வடிவம், எப்போதும் திருமாலின் பெயரைத் தன் ஆயிரம் நாவில் தாங்கிப் படத்தை விரித்து நிற்கும்;  தன்னைப் பணிவோர்க்கு வேண்டும் பொருள் ஈயும்.  அடியாரின் இறுதிப் பயணத்திற்கு ஆன நல்வழியாய் அமையும்.  

                                                                                                                                                                                             

மனம் தளராதே!

                                <> மனம் தளராதே! <>

                              

                                            ..அனந்த்

           

            என்றும் மனம்தள ராதே – கண்ணா!

            ...என்னால் வரும்தொல்லை எண்ணிஓ யாதே (என்றும்..) 

         

           

            கோடிப் பிறவியாய்ச் செய்த- பிழை

            ... கோபுரம் போலக் குமிந்தென்னை எய்த

            ஆடிநான் சாய்வதில் என்ன - பெரும்

            ...அதிசயம் ஆகையால் கீதையில் சொன்ன

            வார்த்தை நினைவினில் கொண்டு - உன்னை

            ... வந்தடைந் தால்நீயோ வாய்மூடிக் கொண்டு

            சோர்ந்து கிடக்கின்றாய் இன்று - நான்

            ... செய்திட்ட பாவத்தைக் கண்(டு)ஐயோ என்று

            அஞ்சி நடுங்கிட லாமோ? - நீயும்

            ... அற்ப மனிதர்போல் ஆகிடப் போமோ?

            கொஞ்சம் மனத்தினைத் தேற்று - என்றன்

            ... குறைகளை உன்னிரு காதினில் ஏற்று

            ஆனை முதலையும் கூட - முன்னம்

            ... ஆற்றிய பாவத்தைத் தூக்கிநீ போடப்

            போன கதைநெஞ்சில் எண்ணு - ஒரு

            ... போக்கற்ற என்மேல் தயவினைப் பண்ணு

            வாழ்வினில் துன்பத்தைக் கண்டு- உன்றன்

            ... வாசலில் நிற்பவர் கோடியாய் உண்டு

            தாழ்ந்துன்னைச் சார்ந்திடும் போது - அவர்

            ... தாபம்தீர்க் காவிடில் வந்திடும் வாது!

            போட்டி உனக்கெவ ருண்டு? - உன்றன்

            ...புகழை நிலைநாட்ட என்துணை கொண்டு 

            காட்டுஉன் வீரத்தை இன்று - நீ

            ... கடவுள்என் றால்என்னைக் காப்பாற்றல் நன்று! (என்றும்..)

                                                                                                               

    (திண்ணை மின்னிதழில் 2003-ல் வெளியானது)

கண்ணன் பிறந்தான்

                 

                   <> கண்ணன் பிறந்தான் <>

நறுமணம் நாறும் பூக்கள் நள்ளிர வலர சாந்தம்

உறுமன முடைய  மேலோர் உவகையில் மகிழப் பூமி

சிறுமழை நனைந்து மேனி சிலிர்த்திடச் சிறையி னுள்ளே

குறுநகை தவழமாயன் குழந்தையாய் அவத ரித்தான்

                                    ****

                      <> குழலோசை <>

மலர்பூத்தது வனம்பூத்தது மதிபூத்தது மகிழ்ந்து

நிலம்பூத்தது நதிபூத்தது நிழல்பூத்தது நாட்டில்

தலம்பூத்தது குடிபூத்தது சனம்பூத்தது வானோர்

குலம்பூத்தது கருமாமணி குழலோசையின் ஒலியில்

                                    ****

                        <> கழல் நிழல் <>

மூங்கிலில் இசையைக் கூட்டும் முகில்வணன் குரலைக் கேட்க

ஏங்கிடும் அன்பர் நெஞ்சில் இனியதோர் கானம் ஆவான்

தாங்கிடும் குன்றால் தன்னைச் சார்ந்தவர் துயரம் தீர்த்தோன்

பூங்கழல் நிழலில் நின்றால் பொங்கிடும் இன்பம் வாழ்வில்!

                                    ****

                         <> மாயனின் சீர் <>

பெருவரை ஏந்தும் கையன் பெற்றமுடை ஆயர்

.. பேசுவதை வேட்கும் பையன்

கருமுகில் வண்ண மெய்யன் கஞ்சனுயிர் நீக்கிக்

.. காசினியைக் காத்த துய்யன்

அருமறை ஏத்தும் ஐயன் அன்புடையர் நெஞ்சை

.. ஆசனமாய்க் கொண்ட மெய்யன்

வருதுயர் தீயில் தூசாய் மங்கவைக்கும் இந்த

.. மாயனிவன் சீராம் ஐயே!

                            ****              

.. அனந்த்

24-8-2016

தமிழர் கண்ட புதுமை

<> தமிழர் கண்ட புதுமை <>

நாமகள் ஈங்கிவர் நாவினில் ’ராக்-அன்-ரோல்’

.. நர்த்தனம் செய்வதாலே

...... நாடொறும் அகத்திலே, அலுவலில், பள்ளியில்

.......... நடக்கையில், உறங்கிடுங்கால்

மாமியின், டாடியின், அங்கிளின், ஆன்ட்டியின்,

.. மழலையின் வாயில்நித்தம்

...... மருவிடும் ஆங்கில மொழியதன் மேன்மையில்

.......... மனமெலாம் லயித்துநிற்க

ஸ்வாமிஜி நவின்றிடும் ஆங்கில உரையினை

.. ’ஸ்கைப்’வழி பார்த்துநிற்பார்

...... சலிப்பது தருவதைத் தவிர்த்திடக் ’கிடா’ரைத்

.......... தடவிமைக் ஜாக்சனைப்போல்

பூமியில் கைகளை ஊன்றியே சுழலுவார்

.. புதியதோர் பரதமென்று

..... புதுமையை இங்ஙனம் தமிழர்கள் வாழ்வினில்

....... புகுத்தியே பெருமைகொண்டார்!

அனந்த்

(19-7-2010)